Бүгін Қазақстан мұсылмандары діни басқармасына қарасты Шымкент қаласында жаңадан бой көтерген «Әл Кәусар» мешіті салтанатты жағдайда ашылды.
Игі шара қасиетті Құран аяттарын оқумен басталып, Бас мүфти хазреттің құттықтау сәлемін ҚМДБ төрағасы орынбасары найб мүфти Кенжеәлі қажы Қоңыратбайұлы жеткізіп, жиналған қауымды құттықтады.
«Бұл мешіт Тәуелсіздік мерекесі қарсаңында ашылып отыр. Жалпы елдің Тәуелсіздігі дүниеде теңдесі жоқ тәтті сөз. Бірақ оның оңайлықпен келмегені түсінікті. Тәуелсіздіктің арқасында елімізде мешіттер қайта бой көтеріп, дініміз мен дәстүріміз оралды. Салт-санамыз қайта жаңғырды. Мешіт салудың дінімізде сауабы орасан», – деді.
Сондай-ақ, найб мүфти Кенжеәлі қажы Қоңыратбайұлы салтанатты шара барысында құлшылық үйінің бой көтеруіне үлес қосқан азаматтарға алғыс айтып, ризашылығын білдірді.
