Қазақстан мұсылмандары діни басқармасы Оңтүстік Қазақстан облысы бойынша өкіл имамы Керімбек Ахметжан қажы Пірәліұлының тапсырмасымен Шардара қаласы «Әбу Мансур әл – Матуриди» мешітінде өкіл имам орынбасары Бекайдар Қымбатов қатысуымен, қала, ауыл имам – молдаларының он айлық есебін қорытындылау жиыны болып өтті. Жиынды «Шардара» орталық мешітінің бас имамы А. Данияров жүргізіп, барлық қала имам – молдаларының 2017 жылғы он ай көлемінде атқарған жұмыстарының жалпы есебі тыңдалды. Басқосуда Шардара қаласында орналасқан «Әбу Мансур әл – Матуриди» мешітінің бас имамы Н. Шәдекұлы, «Аль – Фаттаһ» мешітінің бас имамы С. Шинибеков, ауыл мешіттерінен «Алатау батыр» мешітінің бас имамы А. Умирзаков, «Асылхан ата» мешітінің бас имамы М. Ташов, «Шардара» мешітінің бас имамы С. Абдраманов он ай бойы атқарған төрт бағыт бойынша барлық іс – шаралары, мен мешіт тазалығы әрі жөндеу жұмыстары, шәкірттерді оқыту бойынша есебін видео ролик түрінде тапсырды. Бас қосуда өкіл имам орынбасары Бекайдар Қымбатов қала, ауыл имамдарының он ай бойы атқарған мәліметтерін жеке – жеке тыңдап, бірқатар жағдайларға кеңінен тоқталды. Елімізде Қазақстан мұсылмандары діни басқармасының төрағасы, Бас мүфти Ержан қажы Малғажыұлы хазреттің бастамасымен көптеген игі жұмыстар кеңінен қолға алынып келеді. Дәстүрлі дінімізді насихаттау, жат ағымдарға жол бермеу, жұма намазынан кейін жамағаттарға сауал – жауап ұйымдастыру, зекет қорының жұмыстарына басымдық беру, діни төл басылымдарға жазылу барысы, 2018 жылға республикалық «Ислам және өркениет» газеті, «Иман» журналына жазылу жұмыстарын жандандыру жүктелді. Діни басқарма тарапынан жолданған төрт бағыт бойынша жұмысты жандандыру, жұма уағыздары мен әдептілік секілді рухани іс – шаралардың орындалу барысы жоспарланды. Біліктілікті арттыратын апталық, айлық семинарларды тұрақты түрде жалғастыра отырып, діни сауаттылықты дамыту тетіктері де қарастырылды. Бас қосқан барлық имамдар өз ұсыныс, пікірлерін ортаға салып келер күндерге ортақ мақсаттар қойылды.
Шардара ауданы «Шардара» орталық мешітінің баспасөз қызметі.