Тазалық – мұсылман баласының өмір салтынан ойып тұрып орын алатын асыл құндылықтардың бірі. Ислам діні тазалықты тек сыртқы көріністің көркемдігі ретінде ғана емес, жүрек пен жанның, қоршаған ортаның тазалығымен сабақтасқан имандылықтың белгісі ретінде қарастырады.
Осы игі құндылықты дәріптеу мақсатында Ақмешіт мешітінің әйел жамағаты мешіт аумағында тазалық жұмыстарын жүргізді. Сауапты іске атсалысқан жамағат өкілдері мешіт ішін ретке келтіріп, айналасын тазалап, құлшылық ордасының көркеюіне өз үлестерін қосты.
Алла Тағала қасиетті Құранда:
«Расында, Алла тәубе етушілерді және тазаланушыларды жақсы көреді», – деп баяндайды (Бақара сүресі, 222-аят).
Сондай-ақ ардақты Пайғамбарымыз Мұхаммед ﷺ:
«Тазалық – иманның жартысы», – деген (Муслим риуаяты).
Бұл хадис тазалықтың мұсылман өміріндегі айрықша орнын айқындайды. Өйткені мешіт – Аллаға құлшылық жасалатын қасиетті мекен. Оның тазалығын сақтау – әрбір мұсылманның ортақ жауапкершілігі әрі құрметінің көрінісі.
Мұндай игі бастамалар жамағат арасындағы бауырмалдықты нығайтып қана қоймай, ортақ іске жұмылудың, сауапты амалға үлес қосудың жарқын үлгісін көрсетеді. Әрбір жасалған ізгі іс, төгілген еңбек пен көрсетілген жанашырлықтың Алла құзырында қайырлы амал боларына үміт мол.
Мешіт тазалығына атсалысқан барша әйел жамағатына алғыс білдіреміз! Алла Тағала ниеттеріңізді қабыл етіп, еңбектеріңізге береке берсін! Осындай қайырлы істер көпшілікке үлгі болып, сауапты амалдардың жалғасын табуына себеп болғай!







