Рамазанды сағынып, асыға күткен үмметтің ішінде біз де бармыз. Шымкент қаласы, Қаратау ауданы, Байғұт баба жанынан құрылған Фурқан оқырмандар клубы бұл мерекені ғапылдықта өткізуді қаламай, қыздарымыз бойына біткен қасиеттерін сала отырып, айтар ойы бар, сыйлар сыйлығы бар, алар пайдасы бар керемет рухани отырыс ұйымдастырды. Рухани кеш клубымыздың ұстаздары мен мүшелері және жаңадан қосылған аруларымызбен өтті. “Екі құрметтінің арасындағы мүмін” атты тақырыпта өткен кешіміз Ерлан Ақатаев ұстаздың “Рамазан-рухани тәрбие мектебі” атты кітабын арқау етті. Оқырмандар клубы болғанымыз себепті де кітап оқуды тежемей әрі Рамазанға дайындықпен кіру мақсатында “1 айда 1 кітап” айдарымыздың кітабы ретінде осы кітап таңдалған болатын. Нәтижесінде, қыздарымыз бұл Рамазанды белгілі бір деңгейде, өткен жылдан сапалырақ өткізеді деп сенеміз.
Барша мүмінді сағындырып жеткен Рамазан мүбәрак болсын! Мұсылман бауырларымыздың бұл айдан анадан жаңа туғандай пәк, таза, Раббысына сүйікті, Пайғамбарымызға мақтаулы үмметтерден болып, Рамазанның рахымына бөленулерін тілейміз!