Құрбан шалу тәртібі

  1. Құрбан шалу шариғатымызда Әбу Ханифа мазһабы бойынша шамасы жететін тұрғылықты мұсылмандар үшін жылына бір мәрте уәжіп іс.
  2. Құрбандыққа ұсақ малдан (қой мен ешкіден) жасы бір жасқа толғаны немесе бір жасқа толғанымен бірдей ірі марқа қойлар шалынады. Ал ірі қара малдан: түйеден бес жасқа толғаны, ал сиырдан екі жасқа жеткені шалынады. Пайғамбар (с.а.с.) құрбандыққа мүйізді қара ала қошқарды шалған.
  3. Бір қой бір адамның, бір жанұяның атынан сойылады. Ал бір ірі қараны (түйе, сиыр) жеті кісі отақтасып шалса болады.
  4. Құрбандыққа шалынатын мал түрлі айып, кемшіліктерден ада болуы шарт. Ауру, қотыр, соқыр, ақсақ, өте арық мал сойылмайды.
  5. Құрбандыққа шалынатын малды алдына ала белгілеп не сатып алып бағып, баптау мұстахаб.
  6. Алдын ала дайындалған құрбандық малының жүнін қырқу, міну, сүтін сауу мәкрүһ.
  7. Құрбандықты ханафи мазһабы бойынша айттың бірінші, екінші және үшінші күндері күндіз және түнде шалуға болады. Алайда түнде шалу мәкруһ. Бұл күндер зул-хижжа айының оныншы және он бірінші күндері. Ең дұрысы – Пайғамбардың (с.а.с.) сүннетіне амал етіп айт намазынан кейін шалу. Ал айт намазынан бұрын шалынған мал құрбандыққа жатпайды.
  8. Мұсылман адамның өз құрбандығын өзі шалуы, өз қолымен бауыздауы мұстахаб. Болмаса сенімді мұсылман кісіге тапсырса да болады.
  9. Құрбандықты бауыздаушының мұсылман болғаны дұрыс. Ал  христианның союы мәкруһ іс.
  10. Құрбандық шалынған малдың етін үшке бөліп, бір бөлігін өздері алып, үштен бірін мұқтаждарға садақаға таратып, ал тағы үштен бірін туыстарына,  дос-жарандарына, көрші-қолаңдарына таратады. Қасиетті аятта былай делінген: «Құрбанның етінен өздерің жеңдер әрі пақыр-міскіндерді тамақтандырыңдар» (Хаж, 28).
  11. Құрбандықты шалғанда малдың басын құбылаға қаратып: «Бисмиллаһ! Аллаһу әкбар!  Я, Алла! Өзіңнің разылығың үшін құрбандық шалдым, құрбандығымызды Ибраһим мен Мұхаммед пайғамбарлардан (с.а.с.) қабыл алғаныңдай қабыл ала гөр!» – деп айту керек.
  12. Құрбандық малды қинамай, алдын ала дайындалған өткір пышақпен жеңіл  түрде сою керек. Малды өтпейтін пышақпен қинап сою мәкруһ.
  13.  Айт күні таңертең тамақ ішпей, сойылған құрбандықтың етімен ауыз ашу Пайғамбардың (с.а.с.)  сүннеті.
  14. Құрбандықты сойған қасапшының ақысы сойылған малдың етінен, терісінен берілмейді, ақшамен, тағы басқа жолмен беріледі.

Шымкент қаласы орталық мешіті

Редакция

Қазақстан мұсылмандары діни басқармасының Шымкент қаласы бойынша өкілдігі, Шымкент орталық "Halifa Al-Nahaian Aqmeshiti" мешіті. Мекен жайы: ҚР Шымкент қаласы, Темірлан тас жолы, н/з Тел: 8(7252)45-33-38

Добавить комментарий