Шымкент қаласы, Әл-фараби аудандық «Ордабасы» мешітінің жанындағы «Мумтаз» халал асханасында “Басқаға пайдалы болу – сауапты амал” атты рухани шара болып өтті.
Рухани шараға ҚМДБ-ның Шымкент қаласы Бас имамы Бақдәулет қажы Нұрматұлы бастаған қалалық мешіттің ұжымы мен өзге де мешіттердің дін қызметкерлері және «Ордабасы» мешітінің ұжымы мен «Ықылас» қарылық орталығының қыздар бөлімі ұстаздары мен шәкірттері, сондай-ақ, біршама жамағат пен өнер адамдары қатысты.
Жылдың басын сауапты амалмен бастау мақсатында «Ордабасы» мешітінің ұжымы мен «Әжелер» мектебінің үйлестіруімен №4 балалар үйінің бүлдіршіндерін мешітке ішкі істер қызметкерлерінің арнайы алып жүру қызметінің көмегімен бірнеше автобустармен алдырып, арнайы дастархан жайып, құрметті қонақ етіп, сый-сияпаттар үлестірілді.
Сауапты шара имам Мейірбек қарының Құран оқып, имам Бекайдар қажының бата беруімен басталды.
Әуелгі сөз алған, қаламыздың Бас имамы Бақдаулет қажы Нұрматұлы шараны ұйымдастырушыларға және құрметті қонақтарымыз балалар мен олардың жетекшілеріне шынайы алғыстары мен игі тілектерін жеткізді. Шараны рухани байытып «Ықылас» қарылық орталығының шәкірт қыздары өте әсерлі көріністері мен қойылымдарын көрсетіп, діни әндерін арнады. Сондай-ақ, белгілі айтыскер ақын Нұрлан Есенқұлов және өзге де өнер адамдары діни және дәстүрлі әндері мен арнауларын арнады. Рухани шара соңынды балаларға арнап алынған сый-сияпаттар үлестіріліп, Құран оқып, бата берумен түйінделді. Алла мол сауапқа жазсын!

ҚМДБ-ның Шымкент қаласы бойынша баспасөз қызметі