Бүгін Шымкент қаласы бойынша өкілдігінің ұйытқы болуымен Сайрам тұрғын алабында ҚМДБ-ның «Darhan Dala Travel» отандық туризмді насихаттау бойынша «Дархан дала: Сайрамда бар сансыз баб» тақырыбы аясында рухани семинар ұйымдастырылды. 

Аталмыш рухани семинарға Қазақстан мұсылмандары діни басқармасының төрағасының орынбасары, Найб мүфти Мырзабаев Кенжеәлі Қоңыратбайұлы арнайы қатысып, ҚМДБ Төрағасы, Бас мүфти Наурызбай қажы Тағанұлының ыстық сәлемін жеткізіп, қатысушы имамдарға дәріс оқыды.

Семинар барысында Найб мүфти Кенжеәлі қажы Қоңыратбайұлы Ислам, Иман, Ихсан, Шариғат үкімдері және имамдық қызмет ету мәселелері туралы да сөз етіп, ата-баба жолын ұстану, салт-дәстүрлеріміз бен әдеп-ғұрыптарымызға ден қою һәм уағыз-насихат барысында ұтымды қолдану, т.б. мәселелер туралы айтып өтті.

Сондай-ақ, семинар барысында қатысушылар тарапынан қойылған бірнеше сұрақтарға тұщымды жауап берді.

Рухани семинар соңында Шымкент қаласының бас имамы Бақдаулет қажы Нұрматұлы рухани семинарға қатысып, пайдалы ақпараттарымен бөліскен Қазақстан мұсылмандары діни басқармасының төрағасының орынбасары, Найб мүфти Мырзабаев Кенжеәлі Қоңыратбайұлына алғыс айтып, ризалық білдірді.

ҚМДБ-ның Шымкент қаласы бойынша баспасөз қызметі