Бүгін Бас мүфти Наурызбай қажы Тағанұлы Шымкент қаласына барған жұмыс сапарында Оңтүстік Қазақстан мемлекеттік педагогикалық университетінің студенттеріне дәріс оқыды.

Алдымен университет ректоры Гүлжан Дәулетбекқызы оқу ордасының тарихы мен бүгінгі жұмысымен таныстырды.  

Студенттермен кездесуде Бас мүфти: «Асыл – тастан, ақыл – жастан» дегендей, қай қоғамда да жастар жаңаруға, жақсаруға ұмтылып, негізгі қозғаушы күшке айналған. Асыл дініміз Ислам жастарға ерекше маңыз береді. Мысалы, Құран Кәрімдегі «Кәһф» сүресінде иманын сақтап, үңгірге жасырынған жастардың оқиғасы баяндалады. «Олар иман келтірген жастар еді» деп сипатталады. Сол жастардың оқиғасы кейінгі толқындарға үлгі ретінде көрсетілді. Жиырмасыншы ғасырдың бас шенінде ерекше белсенділігімен тарих сахнасына шыққан қазақ зиялыларының да басым бөлігі жастар болатын. Сондықтан жас кезімізді жақсы істерге арнап, білім алуға талпынуымыз тиіс» деді.

Университет ректоры Гүлжан Дәулетбекқызы студенттерге ғибратты дәріс оқыған Бас мүфтиге алғыс білдірді.

Айта кетсек, бүгінде Оңтүстік Қазақстан мемлекеттік педагогикалық университетінің 7 факультетінде 7 мыңнан астам студент білім алуда.

ҚМДБ Баспасөз қызметі