Еліміздегі күрделі ахуалға байланысты Мемлекет басшысы Қасым-Жомарт Тоқаевтың Жарлығымен тұрғындарының қауіпсіздігін қамтамасыз етіп, бүлік салған арандатушылардан қорғау мақсатында еліміздің барлық өңірінде төтенше жағдай жарияланды.
Осыған орай Қазақстан мұсылмандары діни басқармасы ел азаматтарының денсаулығы мен қауіпсіздігін сақтай отырып, 7 қаңтардан бастап еліміздің мешіттерінде жұма намазы оқылмайтынын мәлімдейді.
Елдегі ахуал тұрақталып, төтенше жағдай тоқтатылғанға дейін құлшылықтарды үйде орындаған абзал. Діни басқарма жағдайды түсіністікпен қабылдап, сабырлық танытуларыңызды сұрайды.
Біздің елдің тірегі де, тілегі де – бейбітшілік пен береке-бірлік. Сондықтан қазіргі уақытта өзара сенім білдіру, ақылға жүгіну, тәртіпсіздікке бой алдырмау аса маңызды.
Алла Тағала халқымызды алауыздықтан сақтап, елімізге тыныштық, жұртымызға амандық нәсіп еткей!