18 қазан – Рухани келісім күні. Осы даталы мерекеге орай Шымкент қаласындағы «Қазақстан халқы Ассамблеясы» ғимаратында «Рухани келісім – бірлік пен тұрақтылық кепілі» тақырыбында форум өтті.

Мемлекетіміздің басты стретегиялық бағыты – рухани келісім мен татулықты сақтаудың маңыздылығын насихаттау мақсатында өткен мерекелік шараға Шымкент қалалық және Түркістан облыстық Қазақстан халқы Ассамблеясының мүшелері, М. Әуезов атындағы ОҚМУ басшылығы, діни конфессия өкілдері, ғалымдар, жоғары оқу орындарының оқытушылары мен студент жастар қатысты.

Бақтыбай Бейсенбаев – ҚМДБ Шымкент қаласы бойынша  өкіл имамы:

«Елімізде дінге қысым жоқ. Бастысы әр діни конфессия мемлекет қауіпсіздігіне нұқсан келтірмеуі тиіс.  Бір ғана Шымкент қаласының өзінде 100- ден астам мешіт бар. Дініне берік азаматтар ел бірлігіне де сүбелі үлес қосады» – деді қаланың өкіл имамы.

Мұратәлі Қалмұратов – Шымкент қалалық  Қазақстан халқы Ассамблеясы төрағасының орынбасары:

Еліміз бағындырған белестер мен толағай табыстар – Қазақстандағы халықтар ынтымағының арқасы. Бірлігі бекем елдің тірлігі де тиянақты. Осы тектес орамды ойлар Түркістан облысы мен Шымкент қалалық Қазақстан халқы Ассамблеясы өкілдері өткізген жиында айтылды.

«Рухани келісім – бірлік пен тұрақтылық кепілі» атты форумға ассамблея мүшелері, дін өкілдері мен жастар бас біріктірді. Басты мақсат өскелең ұрпаққа Рухани келісім  күнінің маңызы мен мазмұнын түсіндіру.  Себебі елімізде алдағы 20-30 жылға  нақтыланған стратегиялық жоспарларға қол жеткізетін де осы жас ұрпақ. Ұйымдастырушылар аймағымызды ата мекен санаған   100 ден астам ұлт пен ұлыс өкілдерінің ынтымағының маңыздылығына тоқталды.

Форумда  Түркістан облысы мен Шымкент қаласы «Нұр  Отан» партиясы төрағасының бірінші орынбасарлары  және халық қалаулылары баяндама оқыды. Ұлт аралық  татулық, діни келісім жайлы сүбелі сөз тыңдаған жастар руһани азық жинап қайтты.

ҚМДБ-ның Шымкент қаласы бойынша өкілдігінің баспасөз қызметі