Наурызбай қажы ТАҒАНҰЛЫ Қазақстан мұсылмандары діни басқармасының төрағасы, Бас мүфти
Құрметті қауым!
Баршаңызды Конституция күнімен құттықтаймын. Сіздерге Алладан амандық, мықты саулық, мол ырыс пен бақ-береке тілеймін!
Ел басқаруда даналық жолды ұстанған кез келген басшы халықтың бірлігі мен берекесін, бейбітшілігі мен игілігін, ар-ожданы мен діни сенімін жоғары қойып, адамгершілік құндылықтарға нұқсан келтірмеуге тырысқан.Бабалардың игі жолын жалғаған Мемлекет басшысы, қадірлі Қасым-Жомарт Кемелұлы қоғамда адамдар арасында әділдік пен теңдік сынды құндылықтардың орнауына маңыз беріп келеді. Президентіміз бір сөзінде: «Мемлекет ең алдымен, бәріне бірдей мүмкіндік беріп, әділдік орнатады» деген болатын.
Қасиетті кітабымыз Құранда «Ниса»сүресінің 58-аятында былай делінген: «Алла сендерге аманаттарды иелеріне қайтаруды және адамдар арасында билік айтқандарыңда әділ үкім шығаруды бұйырады. Міне, осылайша Алла сендерге қандай керемет насихат айтуда. Шүбәсіз, Алла – Сәмиғ (айтқан сөздерің мен үкімдеріңнің бәрін естуші) һәм Басир (не істеп, не қойып жүргендеріңнің бәрін көруші).
Әділдік бар жерде, береке бар. Ал әділдік жоғалған жерде адам өмірінің берекесі болмайды. Өйткені, әділдік – барша азаматқа ортақ құндылық. Ал адам құқығы мен құндылығының негізгі кепілі – Ата заң.
Конституциямыздың 14-бабында: «Заң мен сот алдында жұрттың бәрі тең. Тегіне, әлеуметтік, лауазымдық және мүліктік жағдайына, жынысына, нәсіліне, ұлтына, тіліне, дінге көзқарасына, нанымына, тұрғылықты жеріне байланысты немесе кез келген өзге жағдаяттар бойынша ешкімді ешқандай кемсітуге болмайды» делінген.
Біз демократиялық, зайырлы, құқықтық және әлеуметтік мемлекет ретінде даму жолына түскен елміз. Біздің елде азаматтық қоғам жүйесі қалыптасып, адам құндылықтары басты орынға шығуда. Ендеше, азаматтық қоғамды қалыптастырып, ар-ожданымыздың алтын қазығы саналған Ата заңымызда айқын жазылған адамгершілік құндылықтарды дамыту сіз бен біздің белсенді, игі де ізгі амалдарымызға байланысты.
Алла Тағала еліміздің тәуелсіздігін баянды етіп, халқымыздың бірлігі мен ынтымағын арттырып, жақсылығы мен берекесін жаудырғай. Ел аман, жұрт тыныш болғай! Әумин!