Шымкент қаласы, Еңбекші ауданында орналасқан мешіттердің дін қызметкерлері арасында «Әуезді азан жарысы» өтті.
Жарысқа Еңбекші ауданына қарасты мешіттерден 21 азаншы қатысып бақ сынады.
Сайыстың шымылдығын ашқан Шымкент қаласының бас имамының орынбасары Мұхамеджан Естеміров жиналған қауымға қаланың бас имамы Бағдәулет Қажы Нұрматұлының сәлемін жеткізіп, азан айтудың дініміздегі орны мен Алла Тағаланың азаншыға дайындаған ақыреттік сыйы туралы сөз қозғап, Алла елшісінің (оған Алланың салауаты мен сәлемі болсын): «Кімде-кім жеті жыл сауабына сене отырып азан шақыратын болса, Алла осыны, оның тозақтан құтылуына кепілдік қылады», – деген хадисін жеткізді.
Шымкент қаласының бас имамының орынбасары Ахметжан қажы Пірәліұлы да іс шарамызға қолдау білдіріп, жамағатқа уағыз айтты. Өз кезегінде Еңбекші ауданының бас имам Орын Ербосын құттықтау сөзін сөйлеп, сайысты ұйымдастырушы «Ар- Рақиб» мешітінің ұжымына алғысын білдірді.
Сайысқа қатысқан азаншылардың арасында жүзден жүйрік жеңімпаздарды анықтау оңайға соқпады. Азаншының мақамына, дауыс ырғағына, азан сөздерін қатесіз толық айтуына, әріптерді махражынан (тиісті орнынан) шығаруына, Азан дұғасын қатесіз оқуына әділқазылар алқасы тарапынан баса мән берілді.
Шымкент қаласының бас имамының орынбасары Мұхамеджан Естеміров, Әл-Фараби ауданының бас имамы Ералы Сапарбайұлы және Қаратау аудандық «Байғұт баба»мешітінің бас имамы Қалшабек Ербол имамнан құралған әділқазылар алқасы, қатысушылардың арасынан осы аталған талаптар негізінде жеңімпаздарды анықтады.
Сайыс қорытындысы бойынша:
1-орын – Еңбекші аудандық «Исамиддин баба» мешітінің азаншысы Талғат Бейсеков ;
2-орын «Ар-Рақиб» мешітінің азаншысы Бахиев Абдужаббар;
3-орын «Амали- Солих мешітінің азаншысы Махмудов Сайдусман ие болды.
Барлық қатысушыларға арнайы сыйлықтар және алғыс хат табысталды.
Сайысқа жиналған қауымға дастархан жайылып, барлық қатысушылар осындай игі шараны жоғары деңгейде ұйымдастырған «Ар-Рақиб» мешіті ұжымы мен белсенді жамағаттарына және дін жанашырлары демеуші азаматтарға алғыстарын білдірді.
